મકાનની દીવાલ ચણવા માટે પથ્થર શ્રેષ્ઠ માધ્યમ છે પ્રાચીન મકાનો અને કિલ્લાઓ પથ્થર વડે જ બનેલા. મકાનો બાંધવાનું કામ સરળ અને ચોકસાઈપૂર્વકનું બનાવવા માટે ઈંટનો ઉપયોગ શરૃ થયો. માટીની બનેલી લંબચોરસ ઈંટ પણ પ્રાચીનકાળથી બાંધકામમાં વપરાય છે.
જમીનમાંથી મળતી માટીમાં અનેક ધાતુદ્રવ્યો હોય છે. માટીમાંથી બનતી લાલ ઈંટમાં લોહતત્ત્વ વધુ હોવાથી લાલ બને છે. માટી અને પાણીના મિશ્રણને ઢાળીને તેમાંથી લંબચોરસ ઈંટો બનાવાય છે. કાચી ઈંટને ૧૦૦૦ સેન્ટીગ્રેડ ગરમીમાં તપાવીને પકવાય છે. આ માટે મોટી ભઠ્ઠીઓ હોય છે. એલ્યુમિનિયમ અને સિલિકોન ધરાવતી માટીમાંથી પીળારંગની સિરામિક ઈંટ પણ બને છે પરંતુ સાદી લાલ ઈંટોનો વ્યાપક ઉપયોગ થાય છે.
દીવાલ ચણવા માટે ઈંટોની આડી લાઈન ગોઠવાય છે.
લાઈનમાં રહેલી બે ઈંટોનો સાંધો ઉપરની ઈંટની મધ્યમાં આવે તે રીતે ઉપરની ઈંટ ગોઠવાય છે. પરિણામે દીવાલનું વજન દરેક ઈંટ ઉપર સરખાભાગે વહેંચાય છે. બધી ઈંટો એક સાથે ચોંટી રહે તે માટે તેની વચ્ચે રેતી સિમેન્ટ મેળવીને કોંન્ક્રિટ પાથરવામાં આવે છે.